دوزخ

ابن سیرینؒ کے مطابق دوزخ میں ہونا اور نہ نکل پانا گناہ گاری کی علامت ہے، جس پر توبہ ضروری ہے۔ دوزخ دیکھنا بغیر تکلیف کے غم و مصیبت کے بعد سلامتی کی علامت ہے۔ دوزخ میں کھانا کھاتے آگ میں جلنا برے عمل کے وبال کی علامت ہے۔ فرشتے کا پیشانی سے پکڑ کر دوزخ میں ڈالنا بدبختی کی علامت ہے۔

امام ابراہیم کرمانیؒ کے مطابق دوزخ کا کھولتا پانی پینا باطل علم میں مشغول ہونے کی علامت ہے۔ تلوار لے کر دوزخ میں جانا بری بات کہنے کی علامت ہے۔ دوزخ میں کچھ کمانا یتیم کا مال کھانے کی علامت ہے۔

امام جابر مغربیؒ کے مطابق دوزخ میں گھسیٹا جانا کفر کی علامت ہے، جیسا کہ قرآن میں ہے: یَومَ یُسحَبُونَ فِی النَّارِ عَلٰی وُجُوهِهِم (جس دن انہیں چہروں کے بل آگ میں گھسیٹا جائے گا)۔ دوزخ میں جا کر واپس آنا اور گناہ سے توبہ کرنا اچھی علامت ہے۔ دوزخ کی آواز سننا حکمران کے رعب کی علامت ہے۔

امام جعفر صادقؓ کے مطابق دوزخ کی چھ ممکنہ تعبیریں ہیں: اللہ کا غضب، گناہ میں جلنا، حکمران کا ظلم، دنیا میں تنگی، مصیبت، یا خود دوزخی ہونا۔